Прѣначѧлноомоу начѧлꙋ. и безначѧлноѡмоу бе͠ствоу. Рекѫ же прѣс͠тѣи тр͠циу Слава оц͠оу и сн͠͠оу и с͠томоу д͠хоу поспѣваѫщомоу въ начѧлѣ. И съвръшаѫщомоу въскорѣ полезнаа. развѣ бо того ни слово, ни дѣло съвръшаеть сѧ. Имьже того блг(д)тиѧ и помощиѧ. Почѧ сѧ и съвърши сѧ. Сие малое дѣло. Зовомое пѣснивець. Съ всѣкымь оуставомь. И съ ѿвѣты. Въ лѣ(т). ѕ͠. Ѡ͠. м͠͠е. Ендихто .е͠͠. повелѣниемь прѣвысокааго ц͠рѣ нашего. Б͠гомь избраннаго. И б͠гомь вѣнчѣанааго іѡа(н), алеѯан(д)ра.
Тѣмьже оубо съшедьше сѧ. И прославимь б͠га. И съликъствоуимь истиноѧ. Пѣснь вислѣмь хо͠у ц͠рю въсѣчъскым. Вѣнцоудѣтелю, и їздателю. въседръжоу. давшааго намь великааго воеводѫ. И ц͠рѣ ц͠ремь. Великааго іѡа(н), алеѯан(д)ра. Православнѣиша въ въсѣчъскыхь. Старѣишина же, и воиноначѧлника. И въ бранехь крѣпкааго, рачителна же и блг͠ооувѣтлива. роумѣннодоброзрачнаго, и краснаго видомъ. Колѣносъжѫта, и правоходца. Зрѧ сладко очесы на въсѣхь, неизреченнаго сѫдиѧ праведнаго. Сырымь же и вдовамь. Кы, оубо рекѫ въ на(с) коего ц͠рѣ видѣвь. Скръбень въ свои домь възвратить сѧ. Дроугаго же мънѧ алеѯандра, древнѣаго въ сила(х) еже въ ворвани. Такожде же и сыи изначѧла многы прѣѧть крѣпостиѧ и мѫжествомь. Съи въ на(с) ꙗвлеи сѧ великы іѡа(н), алеѯан(д)ръ, въсѣмъ блъгаро(м), цр(с)воуѧи. Иже брани показа велиѧ и крѣпкыѧ. И гръцкаго ц͠рѣ низложивъ дръжавно. И шѫтаѧ сѧ его ѧть рѫкама. И грѣдовы прѣѧть крѣпостиѧ. Несѧбръ и въсе поморие, съ романиѧ. Таже коупн(о) бъдинь и въсе подоунавие. Даже и до моравѫ. Прочии же градове, и веси, страны же и села. Текѫще валѣахѫ сѧ къ ногама того ц͠рѣ. И врагы своѧ въсѧ емь рѫкама поднозѣ подложи. И твръдѫѧ тишинѫ въселенѣи показа. мнить же ми сѧ ꙗко съи ц͠ръ, дроугы ꙗви сѧ еже въ ц͠рѣхь костандинь. Вѣроѧ и бл͠гочъстиемь, и ср(д)цемь и нравомь, и скифтро имы въ себѣ, кр(с)та побѣдоносца. Сеѧ хорѫгвоѧ, показаниемь и ꙗвлениемь, въсѧ съпротивныѧ и гръдыѧ силы прогнавъ и расточи. ꙗкоже и въ иср͠лтохь помѣнѫхо(м). Еже въ ни(х) ворваниа, егда съражаахѫ сѧ съ съпротивными. Тако и съи ц͠ръ блъгаро(м). Оуповавь на таковое побѣдоносное дрѣво. Въсѧ силы поправь дръжавно. И разгнавь ихь крс(т)нымь пособиемь. Никы же ми сѧ мьнить таковы ц͠ръ еже въ пръвыхь ц͠рехь. ꙗкоже съи великыи ц͠рь іѡа(н), алеѯандръ. Похвала и слава блъгарѡ(м). Оузрите н͠нѣ мали и велицїи. И съставите знаменїꙗ и воеванїꙗ. Къ побѣдоносномоу ц͠рю блъгар(с)комоу. Придѣте н͠нѣ патрїꙗрси и с͠тителие. Мниси же и иноци. Сѫдиѧ и болꙗре. И весь причъть цр͠квны. Простыхь раби и свободи. Вельмѫже и въсе воинство. И сърадоуите сѧ. Радостиѫ неизгланноѧ. И славѫ въслите великоомоу ц͠рю х͠оу б͠оу. вѣнцоудателю. И къ немоу възъпите пѣсни побѣдныѧ. Т͠рце с͠таа съхранѣи ц͠рѣ блъгарскааго. Покрываи, и оутвръди его. Побѣдѫ даждъ емоу на съпостаты и врагы его въсѧ низложи въсѧ до конца. И длъга лѣта дароуи емоу б͠е въсѣчъскымь. Азъ же радостныѧ похвалы съплеты емоу рекы. Радоуи сѧ блъгар(с)кы ц͠рю. Радоуи сѧ цр͠ю ц͠ремь. Радоуи сѧ б͠гомь изьбранне. Радоуи сѧ мл(с)тивы. Радоуи сѧ б͠гомь вѣнчѣне. Радоуи сѧ вышъши. Радоуи сѧ б͠гомь храннмы. Радоуи сѧ воиноводьче. Радоуи сѧ вѣрнымь застѫпниче. Радоуи сѧ блъгар(с)каа славо и похвало. Радоуи сѧ ц͠рю алеѯан(д)ре. Радоуи сѧ іѡане. Радоуи се съ благочъстивымь своимь съпрѫгомь. Съ ц͠рцеѧ ѳеѡ(д)рѫ. Радоуита сѧ съ сладким чѧды вашими. Михаиломь ц͠ремь асѣнемь. И срацимиромь и асѣнемь. Радоуи сѧ трънове граде. Радоуите сѧ еговы грады и страны. Радоуите сѧ, и пакы сърадꙋите сѧ. ꙗко имѧще ц͠рѣ таковааго. б͠гъ же въ дръжавѣ ихь да оукрѣпїтъ ихъ. И да подасть имь цр(с)во небесное. И да въселить ихь въ чрътогь села своего, въ вѣкы бесконечныѧ въсегда и н͠нѣ и прїсно и въ вѣкы вѣкомь амїнь.
𐡸𐫱𐡷
Източьникъ